Кинескиот претседател Си Џинпинг денеска ја почнува тридневната посета на Русија, на покана на неговиот руски колега, Владимир Путин. Фокусот на разговорите, според официјален Кремљ, ќе биде натамошно продлабочување на партнерските односи меѓу двете земји.
„Државната посета на претседателот Џинпинг на Русија претставува пресвртница во руско-кинеските односи во новата ера. Ова ќе биде силен поттик на билатералните односи и развој на меѓусебните врски на високо ниво“, изјави кинескиот амбасадор во Москва, Џанг Ханхуи и додаде дека двајцата државници се сретнале 40 пати во последните 10 години.
Според портпаролот на Кремљ, Дмитри Песков, најпрво е планирана средба во четири очи меѓу Путин и Џинпинг, а потоа и заедничка вечера. Разговори во проширен круг на луѓе се планирани за вторник.
Денешната посета на Џинпинг на Кина е негова прва по, речиси, четири години. Кина официјално не ја осуди руската инвазија на Украина, но досега главно се придржуваше на санкциите кон Москва. Официјален Пекинг, исто така, сигнализираше дека евентуална руска употреба на нуклеарно оружје е неприфатлива.
Посетата на Џинпинг на Москва беше официјално потврдена во петокот. Неколку часа по најавата, Меѓународниот кривичен суд издаде налог за апсење на рускиот претседател, Владимир Путин за наводно воено злосторство – присилна депортација на украински деца во Русија.