Осомничени за незаконити распоредувања и финансиска штета од над 310.000 денари
Кривична пријава за злоупотреба во МВР. Двајца поранешни вработени во Министерството за внатрешни работи се соочуваат со кривична пријава. Поради сомнение за „злоупотреба на службената положба и овластување“, согласно член 353 став 4 во врска со став 1 од Кривичниот законик. Пријавата ја поднесе Одделот за внатрешна контрола, криминалистички истраги и професионални стандарди до Основното јавно обвинителство Скопје.
Четворица полициски функционери под истрага – Кривична пријава за финансиски злоупотреби во МВР
Премолчено ослободување и незаконит предлог за распоредување
Првопријавениот Б.Д., пензиониран началник на Регионалниот центар за гранични работи Север, и покрај сознанието дека еден работник со правосилна пресуда бил ослободен од прекршочна одговорност, не поднел ургенција за враќање на неговото одземено службено оружје. Наместо тоа, изготвил предлог за негово времено распоредување. Потоа предложил друг работник да биде поставен на тоа место како да е слободно.
Интерен оглас без основ и прикривање на реалната состојба
Втората пријавена е В.В., поранешен помошник директор во Одделот за заеднички работи и управување со човечки ресурси при Бирото за јавна безбедност. Таа без да провери дали позицијата е навистина слободна, објавила телеграма за интерен оглас. Иако знаела дека позицијата е само времено испразнета, таа не ставила никаква забелешка како член на комисијата и се согласила со изборот.
Финансиска штета и повреда на процедурите
Со своите постапки, осомничените му нанеле штета на вработениот кој бил неправилно распореден. При што биле причинети трошоци во висина од 310.268 денари. Случајот ја отвора темата за потребата од строга контрола врз интерните процедури во институциите и одговорност за прекршување на законите.
Извор: Курир