Масовни собири најавени по федерална интервенција
Смртоносниот инцидент во Минесота предизвика бран реакции и најави за масовни протести низ Соединетите Американски Држави. Граѓански организации и здруженија за заштита на правата на имигрантите повикаа на излегување на улица по убиството на активистката, застрелана од агент на федералната служба за имиграција.
За овој викенд се планирани повеќе од 1.000 протести ширум земјата. Барањето е јасно – да се запре масовното распоредување на припадници на Бирото за имиграција и царина (ICE), наредено од претседателот Доналд Трамп. Особено се критикува присуството на федерални агенти во градови со демократско раководство.
Убиството во Минеаполис и контроверзните тврдења
Ескалацијата во Минеаполис следеше по убиството на 37-годишната Рене Гуд, мајка на три деца. Таа била застрелана додека се наоѓала во својот автомобил.
Настанот се случил кратко време откако во градот биле испратени околу 2.000 федерални агенти, во рамки на операција која Министерството за внатрешна безбедност ја опиша како „најголема во историјата“.
Министерката Кристи Ноум соопшти дека агентот отворил оган во самоодбрана, наведувајќи дека Гуд се обидела да го удри со возилото. Градоначалникот на Минеаполис, Џејкоб Фрај, соопшти дека видеоснимка од настанот ја доведува во прашање таа верзија.
Истраги, Национална гарда и спорни видеоснимки
ФБР и локалните власти во Минесота започнаа одделни истраги за инцидентот. Гувернерот Тим Волц ја стави Националната гарда во состојба на зголемена готовност.
Случајот предизвика асоцијации со убиството на Џорџ Флојд во 2020 година. Тоа се случи на неколку улици од местото каде што беше убиена Рене Гуд.
Снимка од камерата на полицаецот Џонатан Рос покажува дека Гуд била мирна неколку секунди пред да тргне со автомобилот. Потоа, Рос пукал во неа. Според официјалните информации, агентот бил хоспитализиран со повреди, но од објавените видеа не е јасно дали воопшто бил удрен од возилото.