Историски самит за европската интеграција
Во Брисел утре ќе се одржи историскиот Euronews Enlargement Summit, каде европските и кандидатските лидери ќе разговараат за иднината на проширувањето на Европската унија кон исток и југоисток. Настанот е прв ваков формат што овозможува директен дијалог помеѓу носителите на одлуки во Унијата и лидерите на земјите кои чекаат членство. Дискусиите ќе бидат пренесувани во живо на телевизиските и дигиталните платформи на Euronews.
Самитот ќе го отвори претседателот на Европскиот совет, Антониу Кошта, а меѓу учесниците се претседателите на Молдавија и Србија, Маја Санду и Александар Вучиќ, како и премиерите од Западен Балкан, Христијан Мицкоски (Македонија), Еди Рама (Албанија) и Милојко Спајиќ (Црна Гора). На настанот ќе учествува и еврокомесарката за проширување, Марта Кос.
Перспективи и предизвици за земјите-кандидати
Целта на самитот е да им овозможи на кандидатските земји да ги изложат своите ставови и перспективи за пристапниот процес. Молдавија се соочува со хибридни закани од Русија, додека Западен Балкан долго време чека отворање на вратите кон Унијата.
Украина поднесе барање за членство само четири дена по руската инвазија во февруари 2022 година и за рекордни четири месеци доби кандидатски статус. Молдавија го следеше истиот пат и очекува да ги заврши преговорите до 2027 година. Црна Гора е најнапредна меѓу кандидатите, со 33 отворени и седум привремено затворени поглавја, со цел целосно членство до 2028 година. Македонија, пак, останува најдолг кандидат аплицирала уште во 2004 година, но се соочува со блокади од билатерални спорови.
Процесот на проширување како клуч за иднината
Самитот ќе се одржи истовремено со објавувањето на Годишниот извештај за проширување 2025 од Европската комисија, кој ќе го зададе тонот на европската политика за следната година. Euronews истакнува дека процесот на проширување не е апстрактен, туку директно ги засега милиони граѓани и ја одредува визијата за Европа како простор на стабилност, демократија и заеднички вредности.