Премиерот Христијан Мицкоски денеска присуствуваше на отворањето на 81. Генерално собрание на Обединетите нации во Њујорк. Во рамки на посетата, тој учествуваше и на Самитот на партнерите за мултилатерализам, на кој присуствуваа повеќе европски и светски лидери.
„Место каде што се среќаваат светските лидери и се отвораат важни прашања за мирот, безбедноста, развојот и иднината на меѓународната соработка“, истакна Мицкоски за Генералното собрание на ОН.
Самитот на партнерите за мултилатерализам го организираше претседателот на Европскиот совет, Антонио Кошта, заедно со претседателот на Кенија, Вилијам Руто, и премиерот на Канада, Марк Карни, јави специјалниот известувач на МИА од Њујорк.
На самитот присуствуваа и претседателката на Европската комисија, Урсула фон дер Лајен, австралискиот премиер Ентони Албанезе, министрите за надворешни работи на Индија и Бразил, српскиот претседател Александар Вучиќ и други светски лидери.
Сесијата на Генералното собрание ја отворија генералниот секретар на Обединетите нации, Антонио Гутереш, и претседателот на Генералното собрание, Калилур Рахман од Бангладеш.
Меѓу обраќањата на светските лидери, најголемо внимание предизвика настапот на американскиот претседател Доналд Трамп.