Мицкоски: Со дел од синдикатите што денеска протестираат постигнувавме договори за подобри услови за работа

Протестите оценети како традиционални првомајски активности

Премиерот Христијан Мицкоски изјави дека дел од синдикатите што денеска протестираат претходно учествувале на заеднички прес-конференции на кои, како што рече, биле постигнувани договори за повисоки права и плати.

Тој посочи дека денешниот собир го гледа како дел од вообичаените првомајски активности.

„Ова нивно протестирање денеска го класифицирам во групата традиционални првомајски протести кои, впрочем и синдикатите треба да ги прават. Право на секој граѓанин е да протестира и да се бори за поголеми права. Ние сме демократска држава, ова е демократска Влада, така што ние тоа право го почитуваме“, истакна премиерот.

Изјавата ја даде од Охрид, по поставување камен-темелник за катна гаража кај Градскиот пазар.

Посета на Охрид и увид во проекти

Мицкоски во рамки на посетата на Охрид најави и теренски активности.

Тој треба да изврши увид на градежните работи на плоштадот „Кај Чинарот“, како и на проектот за пумпната станица „Метропол“.

Во посетата е придружуван од вицепремиерот и министер за транспорт Александар Николоски.