Украина повторно ја насочи својата офанзива кон руската енергетска инфраструктура – овојпат со удари врз рафинерии во два региони во близина на реката Волга. Нападите предизвикаа пожари и материјална штета, додека Москва тврди дека дел од беспилотните летала биле пресретнати.
Гувернерот на Волгоградската област, Андреј Бочаров, информираше дека градот Волгоград бил погоден во текот на ноќта и дека остатоците од дроновите оштетиле неколку станбени објекти. Рафинеријата во овој град, една од најголемите во Русија, веќе претходно беше мета на слични напади.
Во соседната Башкортостан, раководителот на републиката Радиј Хабиров преку Телеграм соопшти дека беспилотни летала ја погодиле рафинеријата и петрохемискиот комплекс на „Газпром Нефтехим Салават“.
„Го проценуваме обемот на штетата. Моментално го гасиме пожарот. Сите служби за итни случаи се на самото место“, наведе тој.
Руското Министерство за одбрана соопшти дека за една ноќ биле пресретнати вкупно 43 украински дронови, од кои околу десет во регионот на Волгоград.