Над 150 претставници од компании учествуваат на форумот во Скопје
Продлабочување на економската соработка меѓу македонските и јапонските компании беше во фокусот на Македонско–јапонскиот бизнис форум што се одржа во Скопје. На настанот учествуваат повеќе од 150 претставници од бизнис-заедницата, а се одржуваат и B2B средби за директно поврзување на компаниите.
На форумот се обрати министерот за надворешни работи и надворешна трговија Тимчо Муцунски. Тој нагласил дека добрите политички односи меѓу двете земји треба да се преточат во посилна економска соработка и конкретни деловни резултати.
„Нашите две земји имаат традиционално одлични и пријателски односи, изградени врз основа на меѓусебна почит, доверба и поддршка. Но пријателството само по себе не е доволно – партнерствата мора да носат и конкретни резултати“, истакна Муцунски.
Трговската размена е околу 140 милиони долари
Според министерот, трговската размена меѓу двете држави во моментов изнесува околу 140 милиони долари годишно. Тој оцени дека тоа е солидна основа за соработка, но далеку под реалниот потенцијал на двете економии.
Муцунски нагласи дека земјата нуди стабилна економска средина и отворен пазар за инвеститорите. Дополнително, како предности ги посочи институционалната поддршка за инвестиции, квалификуваната работна сила и стратешката географска позиција.
„Она што е најважно не е само инвестицијата, туку партнерството – партнерство меѓу бизнисите, меѓу иноваторите и меѓу две земји кои веруваат во отвореност, соработка и заеднички просперитет“, нагласи министерот.
Потенцијал за соработка во технологијата и зелената транзиција
Муцунски оцени дека во услови на брзи промени во глобалната економија, соработката меѓу компаниите од двете земји може да отвори нови можности.
Според него, потенцијал постои во области како технологијата, производството, зелената транзиција и напредните индустрии.
Тој додаде дека Владата ќе продолжи со мерки за подобрување на бизнис-климата и олеснување на инвестициите. Целта е контактите воспоставени на форумот да доведат до конкретни проекти и долгорочни економски партнерства.
Македонско–јапонскиот бизнис форум претставува платформа за поврзување на компаниите од двете земји и отворање нови можности за инвестиции и деловна соработка.