Денеска се навршуваат 25 години од трагичниот настан кај месноста Љуботенски Бачила, во кој животите ги загубија осум припадници на резервниот состав на македонската Армија, напиша министерот за одбрана Владо Мисајловски.
По повод годишнината, Мисајловски им оддаде почит на загинатите бранители, порачајќи дека нивната жртва за татковината никогаш не смее да биде заборавена.
„На денешен датум, Македонија изгуби уште осум свои синови, осум македонски херои, припадници на резервниот состав на македонската Армија“, порача Мисајловски.
Во трагичниот настан кај Љуботенски Бачила загинаа Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димоски и Раде Јанковски.
Дваесет и пет години подоцна, споменот на загинатите останува дел од сеќавањето на македонските вооружени сили и на нивните семејства.