Бран од незадоволство ја зафати американската технолошка компанија „Гугл“, откако истакнати експерти и истражувачи почнаа да поднесуваат оставки поради употребата на напредни системи за вештачка интелигенција во воени операции. Клучна причина за револтот се потпишаните договори со властите на Соединетите Американски Држави и Израел, кои предизвикаа сериозни етички сомнежи кај кадарот.
Според медиумските извештаи, неколку истражувачи од одделот „Гугл ДипМајнд“, задолжен за развојот на системи за вештачка интелигенција, веќе заминале од компанијата или најавиле повлекување од своите позиции.
Меѓу оние што одлучија да ја напуштат компанијата е и истражувачката Софија Лигуори од Лондон, која по три години минати во корпорацијата поднесе официјална оставка.
„Кога сфатив дека мојата компанија сè повеќе ја поддржува употребата на вештачката интелигенција во воени операции, почувствував срам што работам во Гугл“, изјави Лигуори.
Таа смета дека технолошкиот гигант постепено отстапува од сопствените декларирани етички начела, особено кога станува збор за примена на новите технологии во вооружени судири. Незадоволството кај вработените дополнително порасна по склучувањето на договорот со Пентагон, преку кој се овозможува користење на корпоративните технологии за доверливи активности на американската војска.
Американскиот секретар за одбрана Пит Хегсет претходно порача дека вештачката интелигенција ќе зазема централно место во идните стратешки одбранбени планови на САД.
Поранешниот истражувач Андреас Кирш упати предупредување дека актуелните технолошки модели сè уште не поседуваат доволна прецизност и сигурност за да се применуваат на бојното поле. Тој посочи дека постои реален ризик од погрешни безбедносни процени, особено доколку алгоритмите самостојно одредуваат воени мети, што би можело да предизвика фатални грешки и несакани цивилни жртви.
Дополнителен повод за остри реакции претставува и проектот „Нимбус“, заеднички договор вреден 1,2 милијарди долари меѓу компаниите „Гугл“, „Амазон“ и израелската влада, кој опфаќа испорака на напредна инфраструктура за обработка на податоци.
Раководството на „Гугл“ ги отфрла критиките дека се прекршени етичките стандарди и посочува дека сите владини договори подлежат на ригорозни внатрешни ревизии за одговорна употреба на современите софтверски решенија.