Движењето ЗНАМ за Наша Македонија организираше отворена панел-дискусија во Кичево посветена на двегодишниот отчет од работењето на функционерите. Партиските претставници порачаа дека политичкото дејствување не е само натпревар со ветувања, туку бара конкретна одговорност. Настанот се одржа под официјалното партиско мото „Две години работа. Две години резултати. Една љубов – Македонија“.
„На средината од мандатот, ЗНАМ излегува пред граѓаните со сеопфатен отчет за работата на своите избрани и именувани функционери, преточен во посебна отчетна публикација. Граѓаните имаат право да знаат што е сработено, кои обврски се исполнети и какви резултати се постигнати. Отчетноста не е обврска само пред избори, туку секојдневна одговорност кон оние што ни ја дале довербата“, истакна лидерот на Движењето ЗНАМ, Максим Димитриевски.
Димитриевски подвлече дека отчетот се темели на над 1.200 реализирани капитални проекти во македонските општини. Тој нагласи дека се забележува силен напредок во патната мрежа и изградбата на Коридорот 8 и Коридорот 10, како и придобивки од линеарното покачување на пензиите и растот на платите во неколку витални општествени гранки со цел подобар стандард за граѓаните.
„Не бараме доверба врз основа на убаво изговорени зборови. Довербата се оправдува со работа, со одлуки и со резултати што луѓето можат да ги препознаат. Затоа сме меѓу граѓаните и денес, затоа ќе продолжиме да разговараме отворено и да одговараме за нашата работа. Македонија се сака со дела, а политичката одговорност се докажува токму така“, порача Димитриевски.
На трибината зедоа збор и потпретседателката на Собранието и потпретседател на ЗНАМ, Весна Бендевска, заменик-министерот за енергетика, рударство и минерални суровини, Мирослав Лабудовиќ, како и директорот на Клиниката за физикална медицина и рехабилитација, д-р Злате Мехмедовиќ. Партиските функционери ги анализираа предизвиците во енергетскиот систем, здравството и законодавните реформи, најавувајќи продолжување на отчетните средби низ целата земја.