Британската полиција повторно уапси двајца мажи под сомнение дека ѝ помагале на иранската разузнавачка служба во планирање напад врз воздухопловна база во западна Англија, која се наоѓа под американска управа. Случајот предизвика сериозен аларм во безбедносниот сектор на Велика Британија.

Антитерористичката единица потврди дека осомничените, 24-годишен британски државјанин и 25-годишен маж со двојно британско-иранско државјанство, биле приведени врз основа на Законот за национална безбедност. Двајцата претходно веќе беа приведени за истиот случај, но беа пуштени со кауција додека траеше собирањето материјални докази.

Истражителите од 27 септември водат опсежна постапка за терористички заговор насочен против воздухопловната база РАФ Ферфорд. Станува збор за стратешки воен објект од кој во текот на воените дејствија годинава беа изведувани директни воздушни напади врз цели во Иран.

За време на безбедносниот инцидент минатиот месец, полицијата итно ги евакуираше жителите од околните куќи, а во реонот беа распоредени силно вооружени специјални сили и воени пиротехничари. Инспекцијата подоцна утврди дека во три комбиња на локацијата бил складиран бензин, но не беше пронајден експлозив.

Откако официјален Лондон јавно го поврза Техеран со сомнителните активности, Соединетите Американски Држави превентивно ги повлекоа своите стратешки бомбардери од базата РАФ Ферфорд. Во рамките на истата истрага претходно беа уапсени уште пет лица, кои во моментов се бранат од слобода со платена кауција, а официјално обвинение сè уште не е покренато против ниту еден осомничен.

Шефот на британската антитерористичка полиција, Лоренс Тејлор, соопшти дека надлежните тимови детално проверуваат бројни траги во рамките на овој комплексен меѓународен случај.

„Истрагата интензивно продолжува и се собираат докази, но и натаму сметаме дека е многу веројатно дека во сето ова била вклучена иранската држава“, вели Тејлор.

Тој потенцира дека полициските тимови активно работат на утврдување на целосниот обем на странската инволвираност и точните мотиви зад планираниот упад во воениот објект.