Триесет и петгодишен маж од скопското село Студеничани починал откако, според првичните информации, најверојатно бил погоден од струен удар додека користел вап-машина за миење возило.
Како што информира МВР, на 16 септември околу 11:40 часот во СВР Скопје било пријавено дека во двор од куќа во Студеничани, сопственост на А.С.(56), дошол Х.Б.(35) од истото село и ја земал вап-машината за да го измие возилото.
Во еден момент тој паднал, најверојатно како последица на струен удар.
Со возило на Итната медицинска помош Х.Б. бил пренесен во Комплексот клиники „Мајка Тереза“ во Скопје, каде што починал.
Лекар констатирал смрт, а по насоки на јавен обвинител, телото на починатиот било предадено на обдукција во Судска медицина.