Британскиот комичар и актер Расел Бренд се упати кон судот во црн Мерцедес. Носејќи сива јакна и очила за сонце, тој помина покрај толпа фотографи, во придружба на обезбедување и жена, при што одби да одговара на прашањата од присутните новинари додека влегуваше во судницата.
Судот ќе ги слушне правните аргументи во вторник и среда пред почетокот на главното рочиште. Судењето започнува во понеделник, 12 октомври, и според проценките се очекува да трае до десет недели. Бренд се соочува со сериозни обвиненија кои опфаќаат три точки за силување, три точки за сексуален напад и една точка за непристојни дела. Тој категорично ги отфрла сите обвинувања и тврди дека немало сексуални односи без согласност.
За време на претходните сослушувања пред судските органи беше објавено дека Бренд е обвинет, меѓу другото, за силување жена во хотелска соба за време на конференцијата на Лабуристичката партија во Борнмут. Дополнително, тој се товари за зграпчување на вработена во телевизија за градите и принудување на сексуален чин во тоалетот, како и за бакнување и непристојно допирање на вработена во радио станица.
Педесет и едногодишниот Расел Бренд стана еден од најпознатите британски стендап комичари во текот на 2000-тите години. Во текот на својата кариера тој водеше споредни емисии за познатото реално шоу „Големиот брат“ и глумеше во неколку холивудски филмски проекти. Во последниве години тој целосно се посвети на водење подкасти и активности на социјалните мрежи, а моментално живее во Соединетите Американски Држави. Во текот на целата кривична постапка, тој се брани од слобода.