ПОСВОИЛЕ ДВЕ СЕСТРИ, ПА ГИ ПРЕТВОРИЛЕ ВО РАБОТНА СИЛА: Хрватски брачен пар ги држел девојчињата затворени во гаража

Окружното јавно обвинителство во Дубровник отвори истрага против брачен пар од Хрватска, осомничен за трговија со луѓе. Двајцата, според досегашните сознанија, две посвоени малолетни сестри ги принудувале да работат, ги казнувале физички и ги држеле заклучени во гаража. Случајот бил откриен откако едната од девојчињата побегнала од семејниот дом.

Нејзиниот посвоител ја пронашол и ја однел во регионалната канцеларија на Хрватскиот институт за социјална работа, тврдејќи дека девојчето има проблеми во однесувањето. Разговорите со стручните лица, меѓутоа, откриле сериозни наводи за условите во кои живееле двете сестри. Едната од нив изјавила дека таа и нејзината помлада сестра биле посвоени за да им служат како дополнителна работна сила. Според нејзиното сведоштво, уште пред да одат на училиште морале да работат на фармата, а по наставата биле задолжени со домашни и земјоделски работи, како и со грижа за помладите биолошки деца на посвоителите. Не им било дозволено ниту да учествуваат во воннаставни активности, а во документацијата се наведува и дека биле физички казнувани, при што едно од средствата за дисциплинирање било и шишањето на косата.

Најсериозните наводи се однесуваат на периодот од крајот на мај до почетокот на јуни годинава. Според досегашните сознанија, двете девојчиња тогаш постојано биле заклучени во гаража веднаш до семејната куќа. Им биле давани по два оброка дневно, спиеле на столчиња, а нуждата морале да ја вршат во градината, по што повторно биле враќани во гаражата.

Хрватското Државно обвинителство потврди дека против двајцата осомничени е започната формална истрага за две кривични дела трговија со луѓе.

„Окружното јавно обвинителство во Дубровник донесе решение за спроведување истрага против двајца хрватски државјани за две кривични дела трговија со луѓе“, се наведува во одговорот на обвинителството.

Стручните служби процениле дека девојчињата се наоѓаат во сериозна опасност и дека нивното останување во семејството би можело да го загрози нивниот психофизички развој. Поради тоа, Хрватскиот завод за социјална работа ги издвоил од семејството и ги сместил во установа за социјална заштита, додека на посвоителите привремено им е забранет контакт со нив.

Двајцата осомничени се во притвор. Покрај трговијата со луѓе, надлежните испитуваат и дали нивното постапување содржи елементи на кривично дело против човештвото и човековото достоинство, односно ропство. За овие дела, според хрватските прописи, е предвидена казна затвор до 15 години.