Основното јавно обвинителство Скопје поведе истражна постапка против вработен во Дирекцијата за заштита и спасување, кој е осомничен за кривично дело примање поткуп во износ од 32.000 денари. Поради сериозноста на случајот, јавниот обвинител до судијата на претходна постапка достави предлог за определување мерка притвор.
Надлежното обвинителство донесе наредба за спроведување истражна постапка против осомничениот за сторено кривично дело по член 357 став 1 од Кривичниот законик. Службеникот, вработен во Одделението за издавање урбанистички согласности, бил овластен да потпишува, дава мислење и издава согласност на просторни и урбанистички планови и проекти од аспект на заштитата и спасувањето, како и елаборати за заштита од пожари, експлозии и опасни материи.
Според наводите во истрагата, со цел да изврши службено дејствие што законски не смеел да го стори, односно да одобри елаборат што не ги исполнувал пропишаните услови за градба во делот за заштита од опасни материи и пожари, тој побарал и зел парични средства.
„Осомничениот како службено лице – вработен во ДЗС во Одделение за издавање урбанистички согласности бил овластен да потпишува, дава мислење и издава согласност на просторни и урбанистички планови и проекти од аспект на заштитата и спасувањето и елаборати за заштита од пожари, експлозии и опасни материи. За да изврши службено дејствие, што не смеел да го изврши, односно да даде согласност за елаборат, иако тој не ги исполнувал условите за градба во делот за заштита од пожари, експлозии и опасни материи, осомничениот директно побарал и примил поткуп од едно лице во износ од 32.000 денари“, соопштија од Јавното обвинителство.
Мерката притвор е побарана поради постоење реален ризик од бегство, опасност осомничениот да влијае врз повиканите сведоци во текот на постапката или можност да го повтори истото кривично дело.
Од обвинителството дополнително нагласуваат дека предлогот за притвор во целост е заснован на самата природа на делото, начинот и специфичните околности под кои е извршено, штетните последици, како и службената позиција на лицето.
