Рускиот претседател Владимир Путин даде согласност за продолжување на трилатералните разговори со Вашингтон и Киев за изнаоѓање решение за завршување на војната во Украина. Одлуката уследи по официјалната средба во Москва со специјалниот претставник на американскиот претседател Доналд Трамп, Стив Виткоф.
Информацијата ја соопшти советникот за надворешна политика Јуриј Ушаков. Тој појасни дека Путин „во принцип“ се согласил преговарачкиот процес меѓу трите страни да продолжи веднаш по 10 ноември.
Според најавите од Москва, преговорите ќе бидат насочени кон дефинирање на идната безбедносна архитектура по завршувањето на воените дејствија.
„Разговорите ќе се фокусираат на изградба на безбедносен систем за Русија и за Украина по завршувањето на конфликтот“, рече Ушаков.
Дипломатската средба донесе и конкретен резултат на хуманитарен план. Претставникот Виткоф потврди дека руските власти го ослободиле американскиот државјанин Стивен Хабард, кој се наоѓаше во притвор од 2022 година под обвинение за учество во борбените дејствија во Украина како странски платеник.
Путин лично го информирал Виткоф дека Хабард по излегувањето од притвор бил спроведен на аеродромот „Пулково“ во Санкт Петербург, од каде што заминува назад за Соединетите Американски Држави.