Официјалните економски показатели покажуваат континуиран нагорен тренд на примањата на македонските граѓани. Во период од 27 месеци по промената на власта, просечната плата е зголемена за 130 евра. Ова претставува пораст од речиси 20 проценти во споредба со последниот месец од мандатот на претходната коалициска власт на СДСМ и ДУИ.
Уште позначаен скок е евидентиран кај пензионерските примања. Во мај 2024 година просечната пензија изнесувала 21.209 денари, односно околу 345 евра. Според податоците за август 2026 година, просечната пензија достигнала износ од 29.609 денари, што претставува вредност од околу 480 евра. Ова значи дека просечната пензија по промената на власта бележи пораст од околу 135 евра, со што примањата на највозрасните граѓани се зголемени за приближно 40 отсто во споредба со мај 2024 година.
Позитивното движење продолжува и во споредба со претходните месеци од тековната година. Државниот завод за статистика соопшти дека просечната месечна исплатена нето-плата по вработен во август 2026 година изнесувала 48.733 денари. Оваа сума претставува зголемување од 7,6 проценти во споредба со истиот месец од претходната година.
Годишниот раст на просечната исплатена нето-плата во најголема мера се должи на забележаниот скок на платите во неколку клучни стопански гранки. Во секторот Снабдување со вода, отстранување на отпадни води, управување со отпад и дејности за санација на околината е регистриран раст од 11,9 проценти. Во секторот Административни и помошни услужни дејности примањата пораснале за 10,7 проценти, додека во секторот Преработувачка индустрија зголемувањето изнесува 9 проценти.
На месечно ниво, споредбено меѓу август и јули 2026 година, најголем раст на нето-платите е евидентиран во секторот Снабдување со електрична енергија, гас, пареа и климатизација со зголемување од 5,4 проценти. Потоа следуваат дејностите од областа Уметност, забава и рекреација со пораст од 5 проценти, како и секторот Административни и помошни услужни дејности со месечен раст од 4,2 проценти.