Бројот на заболени е помал за 31,1 проценти во споредба со претходната недела
Во периодот од 23 февруари до 1 март во земјава се регистрирани вкупно 767 случаи на грип и заболувања слични на грип. Податоците ги објави Институтот за јавно здравје. Според нивната анализа, бројот на нови случаи е намален за 31,1 проценти во споредба со претходната недела.
Директорката на Институтот за јавно здравје, Марија Андоновска, посочува дека во последниот период се забележува јасен тренд на опаѓање на бројот на заболени.
„Во последните недели се забележува тренд на намалување на бројката на заболени и можеме да кажеме дека регистрираната инциденца е во рамки на ниската активност“, вели директорката на ИЈЗ, Марија Андоновска.
Таа додава дека врз основа на овие податоци може да се заклучи дека во Македонија во моментов се бележи низок интензитет на вирусот на грип.
Најмногу заболени се регистрирани во Скопје
Според податоците на Институтот, најголем број заболени има во Скопје, каде се регистрирани 447 случаи.
Во Прилеп и Тетово се пријавени по 45 заболени. Во Струмица се регистрирани 39 случаи. Во Штип има 30 заболени лица.
Во повеќе градови бројот на пријавени случаи е помал од 30. Меѓу нив се Гевгелија, Охрид, Куманово, Дебар, Струга, Свети Николе, Гостивар, Радовиш, Пробиштип, Кичево, Битола, Кавадарци, Неготино, Македонски Брод, Велес, Крива Паланка и Валандово.
Во неколку општини, пак, воопшто нема пријавени случаи на грип. Тоа се Демир Хисар, Ресен, Кочани, Берово, Виница, Делчево, Пехчево, Кратово и Крушево.
Над 15 илјади случаи во тековната сезона
Од почетокот на сезоната 2025/2026 до сега, во земјава се регистрирани вкупно 15 751 случај на грип или заболувања слични на грип. Во истиот период се евидентирани и четири починати лица кај кои смртта е асоцирана со грип.
Заклучно со минатата недела, во Македонија се вакцинирани вкупно 79 119 лица. Станува збор за граѓани кои примиле бесплатна или комерцијална вакцина против грип.