ШТО ДА ЈАДЕТЕ КОГА Е НАД 30 СТЕПЕНИ?: Авокадото и јаткастите плодови се меѓу најдобрите избори

Избегнувајте тешка и преработена храна во текот на топлите денови

Кога температурите ќе надминат 30 Целзиусови степени, изборот на храна може значително да влијае врз тоа како ќе се чувствувате во текот на денот. Наместо тешки оброци и намирници што бараат долго готвење, нутриционистите препорачуваат лесна, свежа храна која го поддржува организмот и помага полесно да се справи со жештините.

Експертите советуваат во летниот период да се намали внесот на слатки и високо преработени производи. Освен што придонесуваат за дехидрација, тие го отежнуваат варењето, создаваат дополнителна топлина во организмот и можат да предизвикаат нагли промени на нивото на шеќер во крвта.

Авокадото и јаткастите плодови се препорачуваат во летното мени

Фитнес тренерот Стив Бенет препорачува храната во летните месеци да биде богата со состојки што придонесуваат за стабилно ниво на гликоза и полесно функционирање на организмот. Според него, авокадото и јаткастите плодови се меѓу најдобрите избори.

Авокадото содржи здрави масти и растителни влакна, кои ја забавуваат апсорпцијата на шеќерот од храната.

„Додавањето на влакна, протеини и здрави масти, како што се авокадо или маслиново масло, во секој оброк помага во одржувањето на стабилно ниво на гликоза“, објаснува Бенет.

Јаткастите плодови, пак, благодарение на растителните протеини и здравите масти, го намалуваат влијанието на јаглехидратите врз организмот. Особено се корисни ако се јадат пред или за време на оброк, бидејќи помагаат да се избегнат нагли скокови на шеќерот во крвта.

Како практичен предлог, експертите препорачуваат салата со авокадо, млада зелена салата, јаткасти плодови и малку маслиново или ореово масло. Овој оброк е лесен, освежителен и долго време дава чувство на ситост. Јаткастите плодови се добар избор и како меѓуоброк.

Две едноставни навики што можат да направат разлика

Бенет издвојува уште две препораки кои можат да помогнат во текот на летните денови.

Првата е да се избегнуваат слатки во вечерните часови, бидејќи тогаш телото е помалку чувствително на инсулин, а високото ниво на гликоза може негативно да влијае врз квалитетот на сонот и ноќната регенерација.

Втората препорака е по секој оброк да се направи кратка прошетка од околу десет минути. Според Бенет, оваа навика може да ги намали скоковите на гликозата и до 30 проценти. За физичка активност во лето, тој советува да се избираат посвежите делови од денот, односно раните утрински или доцните вечерни часови.