Анализите потврдуваат дека водата во Скопје е исправна
Водата за пиење во Скопје е со висок квалитет и целосно безбедна за консумирање. Ова го покажуваат деталните анализи и испитувања на примероци земени од различни мерни точки низ градот, кои се спроведени од страна на Секторот за санитарна контрола при јавното претпријатие „Водовод и канализација“.
„Според резултатите од анализите, сите земени примероци во целост се во согласност со Правилникот за барања за безбедност и квалитет на водата за пиење, што значи дека водата во главниот град е исправна и без ризик за здравјето на граѓаните“, соопштија од „Водовод и канализација“.
Континуирани испитувања за контрола на квалитетот
Во текот на периодот од 17 февруари 2025 до 21 февруари 2025 година, екипите на Секторот за санитарна контрола спроведоа обемни испитувања на квалитетот на водата за пиење.
„Во наведениот период беа земени вкупно 198 примероци за физичко-хемиска анализа и 198 примероци за микробиолошка анализа на водата за пиење, при што мерењата беа извршени на 47 различни локации низ градот“, информираат од јавното претпријатие.