Првични резултати: 10 случаи со непотребни или неправилни операции
Домашната стручна комисија, формирана по алармот од кардиологот Сашко Кедев за наводни непотребни операции на срце, досега утврдила дека во 10 од анализираните 19 случаи имало непотребни интервенции или неправилно упатени пациенти. Претседателот на комисијата, д-р Жарко Христовски, нагласува дека во оваа фаза нема да се соопштат имињата на болниците поради нецелосните податоци.
Комисијата засега молчи за болниците – следува подлабока анализа
Христовски објасни дека досегашните наоди се базирани на ангиографските снимки и достапната медицинска документација и дека се на половина од работата. Во следната фаза тимот ќе влезе во здравствените институции, ќе ја прегледа комплетната документација и ќе одржи заеднички состаноци со меѓународната комисија. Додаде дека откривање на болници пред конечниот извештај би било „неетичко и незаконско“.
Ќе следува заеднички извештај со меѓународни експерти
Министерот за здравство, Азир Алиу, рече дека станува збор за прелиминарен извештај и дека финалната проценка ќе биде направена заедно со тројца експерти од странство. Од вкупно 25 пристигнати пријави, комисијата работела на 19, додека шест случаи биле препратени до Државниот санитарен и здравствен инспекторат. Меѓународната комисија сè уште не е формирана.