Во рамки на собраниската надзорна расправа пратеничката Драгана Бојковска, пратеничка од редовите на ВМРО-ДПМНЕ, упати прашање до привремениот администратор на Алта банка Битола, Илија Андовски, околу фактичката состојба во институцијата. Таа нагласи дека приоритет мора да биде сигурноста на заштедите на граѓаните и зачувувањето на целокупниот банкарски систем.
Бојковска побара прецизен одговор дали банката пред влезот на привремената управа ги исполнувала сите пропишани супервизорски критериуми и финансиски барања на надлежните регулатори.
„Моето прашање до Илија Андовски, како привремен администратор на Алта банка Битола е дали Алта банка Битола пред воведување на администрацијата ги исполнувала супервизорските барања. Ова прашање го поставувам затоа што сметам дека за правилно да го разбереме случајот, најпрво мора да утврдиме каква била фактичката состојба во самата банка во Македонија“, изјави Бојковска.
Пратеничката објасни дека српскиот регулатор ѝ ја одземал дозволата за работа на Алта банка Белград, која поседува 95,3 отсто од акциите во битолската банка. Таа подвлече дека станува збор за две сосема засебни правни субјекти кои работат во различни правни системи и под одделен финансиски надзор.
„Имаме ситуација во која на Алта банка Белград и е одземена дозволата за работа од страна на српскиот регулатор. Таа банка е мнозински акционер со 95,3% во Алта банка Битола, но сакам да потенцирам нешто суштинско, Алта банка Белград и Алта банка Битола се две одделни правни лица иако се капитално поврзани. Тие работат во две различни држави, под две различни законодавства и под надзор на два различни банкарски регулатори. Затоа проблемот што настанал кај мнозинскиот акционер во Србија, не смее автоматски да се изедначува со финансиската состојба во Македонија“, порача Бојковска.
Бојковска подвлече дека за време на расправата се неопходни исклучиво официјални и проверени информации, а не ширење паника меѓу граѓаните и депонентите. Според неа, официјалните податоци од Народната банка од почетокот на ноември покажале дека банката била ликвидна и со висок капитал.
„Токму тука е значењето на моето прашање. Во официјалното соопштение на Народната банка во 1 ноември беше наведено дека Алта банка Битола е високо капитализирана, ликвидна со солиден квалитет на кредитното портфолио и дека ги исполнува супервизорските стандарди. Но денес од вас како привремен администратор, очекуваме да добиеме и конкретни сознанија за состојбата што сте ја затекнале. Би сакале да се осврнете на капиталната адекватност и ликвидноста, квалитетот на кредитното портфолио, изложеноста кон поврзаните лица и управувањето со ризиците. Зошто ги спомнувам овие показатели? Затоа што постои голема разлика меѓу банка што има сериозни капитални недостатоци и банка кај која би настапил евентуален ризик како последица на проблемите со нејзиниот доминантен акционер. Според јавно објавениот извештај за деветте месеци од 2026 година, Алта банка Битола располага со приближно 180 милиони евра актива и околу 32 милиони евра капитал и резерви. Тоа се показатели според мене што заслужуваат сериозно внимание, но секако не го заменуваат супервизорскиот процес“, рече Бојковска.