Центарот за јавно здравје повторно анализира вода од изворите во селото Шум
Струга веќе дванаесетти ден се соочува со недостиг на вода за пиење, а институциите сè уште немаат конкретен одговор за решавање на проблемот. Утре се очекува Центарот за јавно здравје да спроведе нови анализи на водата од изворите во селото Шум, од каде што со вода се снабдуваат околу 50.000 жители на градот.
Денес водата беше испратена на проширени анализи во Институтот за јавно здравје во Скопје за да се утврди можно присуство на токсични или канцерогени честички. Вчерашните анализи покажаа дека степенот на заматеност во селото Шум изнесувал 4,40, додека најзаматена вода е регистрирана и во Општата болница во Струга и во детската градинка.
Ископувањата над изворите предизвикаа загадување
„Вие не знаете какво богатство имате во Струга и какво богатство постои можност да го немате повеќе. Сите овие активности и ископувања не треба да се вршат над еден извор. Мојот предлог сега е тие дупки што се направени како метеори, а некои со длабочина од 25 метри, да се затрупаат со тампон-земја и добро да се набие тој простор. И мислам дека тогаш има шанса да се спаси овој извор, ако не – тогаш искрено размислете за нови извори“, изјави Лидија Симоновска од Центарот за јавно здравје – Охрид.
Градоначалникот на Струга, Менди Ќира, истакна дека причината за загадувањето најверојатно се ископувањата над изворите кои ги вршеле две компании пред неколку години.
„Што заклучивме досега? Издавањето дозволи било континуирано повеќе од 10 години, без критериуми и само за материјална корист. Сериозни институционални аномалии. Можеме да заклучиме, имаме и фотографии, дека е направена голема штета, чие враќање во поранешната состојба ќе трае долг период. Ќе преземеме дополнителни научни мерки за заштита на овој водотек, бидејќи се направени длабоки ископувања“, рече Ќира.
Советот бара истрага и формирање експертска комисија
Со заклучоците изгласани денес од Советот на Општина Струга се бара надлежните истражни органи и Јавното обвинителство да преземат дејствија за целосно расчистување на прашањето за функционирањето на каменоломите во заштитената зона на изворот Шум.
Се бара покренување постапки и поднесување обвиненија против сите правни и физички лица кои директно или индиректно го загрозиле снабдувањето со вода за пиење. Општината е обврзана да побара мислење од експерти за да ги процени штетите и ризиците по здравјето на населението, како и да ги утврди потребните мерки за санација. Градоначалникот ќе формира независна експертска комисија која ќе ја утврди одговорноста на општинските власти.