Десетици градови низ Европа бележат рекордни мајски температури поради екстремен пролетен топлотен бран, а метеоролозите предупредуваат дека најлошото допрва доаѓа.
Во Велика Британија е срушен националниот рекорд за мај, откако на аеродромот Хитроу во Лондон биле измерени 33,5 степени Целзиусови, а синоптичарите најавуваат дека температурата може да достигне и 35 степени.
Франција, Шпанија и Обединетото Кралство регистрираат температури и до 13 степени над просекот за овој период од годината, а се очекува стотици нови мајски рекорди да бидат урнати во наредните денови.
Француската метеоролошка служба ја опиша ситуацијата како „прерана, вонредна и долготрајна“ топлотна епизода. Во делови од Франција температурите веќе достигнаа 35,3 степени, а во Париз се измерени над 32 степени.
Во Шпанија, пак, температурите во јужните региони се искачија до 38 степени, а метеоролозите предупредуваат дека до крајот на неделата во некои области може да бидат измерени и 40 степени Целзиусови.
Според експертите, топлотниот бран е резултат на таканаречена „топлинска купола“, при што жежок воздух од Северна Африка останува заробен над Западна Европа.
Климатолозите предупредуваат дека ваквите екстремни појави ќе стануваат сè почести поради климатските промени и дека топлотни бранови во мај и јуни веќе не се исклучок.