Американскиот претседател повторно со остри коментари за Иран и за медиумите
Американскиот претседател Доналд Трамп, од бордот на претседателскиот авион „Ер Форс Уан“, се осврна на неодамна протечената разузнавачка проценка која доведува во прашање ефикасноста на американските воени напади врз нуклеарната програма на Иран. Според Трамп, критиките се неосновани, а операцијата била прецизно изведена.
„Сите три постројки беа совршено погодени“
Во разговорот со новинарите, Трамп изјави:
„Сите три нуклеарни постројки во Иран беа совршено погодени и уништени“, рече американскиот претседател, додавајќи дека американските медиуми покажуваат непочитување кон оние што ја извршиле акцијата.
„Извештаите се полни со непочитување кон луѓето што го извршија нападот“, истакна тој.
Претседателот остро реагираше на внатрешната критика и спинoвите во медиумите, обвинувајќи ги дека се фокусираат на слабости наместо на резултатите.
„Не сакам промена на режимот во Иран“
Иако нападите беа директни и масивни, Трамп потенцираше дека неговата цел не е дестабилизација на иранската власт.
„Би сакал сè да се смири што е можно поскоро. Промената на режимот носи хаос, а идеално би било да немаме толку хаос“, рече тој.
Путин понудил помош, Трамп ја одбил
Во истиот разговор, Трамп откри дека добил понуда од рускиот претседател Владимир Путин да помогне во справувањето со иранската ситуација. Меѓутоа, Трамп ја одбил понудата со саркастичен тон.
„Не ми треба помош за Иран, ми треба помош за тебе“, му реков на Путин“, изјави Трамп, пренесувајќи дел од нивниот разговор.