Читањето и дружењето го чуваат мозокот
Деменцијата сè почесто се поврзува не само со староста, туку и со навиките што луѓето ги градат во средните години. Ново истражување покажува дека активниот и разновиден животен стил може значително да помогне во зачувување на здравјето на мозокот и намалување на ризикот од когнитивен пад.
Студијата, објавена во списанието Alzheimer’s and Dementia, опфатила 587 здрави лица на возраст од 40 до 59 години. Научниците анализирале како животните навики, здравствените состојби и генетските фактори влијаат врз меморијата и когнитивните способности.
Во истражувањето биле следени повеќе ризик фактори, меѓу кои депресија, висок крвен притисок, дијабетес, слаб квалитет на сон, оштетување на слухот, повреди на мозокот, пушење и консумација на алкохол.
Разновидните активности создаваат „заштита“ за мозокот
Резултатите покажале дека најдобар ефект врз мозокот имаат интелектуално стимулативните активности. Меѓу нив се читањето, дружењето, физичката активност, свирењето музика и учењето странски јазици.
Истражувачите утврдиле дека луѓето кои имаат повеќе различни хобија и активности покажуваат подобри резултати во меморијата и вниманието.
Од друга страна, депресијата, лошиот сон, дијабетесот и високиот крвен притисок биле поврзани со послаби когнитивни способности.
Според научниците, разновидноста во секојдневните активности создава заштитен ефект врз мозокот, а во некои случаи нејзиното влијание било посилно и од одредени генетски ризици поврзани со деменцијата.
Експертите советуваат активен и исполнет живот
Истражувачите посочуваат дека не постои сигурен начин за целосно спречување на деменцијата, но здравите навики можат значително да придонесат за подобро когнитивно здравје во подоцнежните години.
„Фокусирајте се на градење на вашата когнитивна резерва преку богат и разновиден животен стил. Не е потребно да извршувате тешки задачи, наместо тоа стремете се кон разновидни активности“, советуваат експертите.