Цената од 200 евра за дневно користење на плажен сет ја изненадила чешката авантуристка Кејт за време на посетата на црногорското крајбрежје. Таа ги проверила цените на лежалките и чадорите на неколку познати плажи во Милочер и на Свети Стефан, а своето искуство го споделила на Инстаграм, каде што редовно ги документира своите патувања низ Европа.
Првата станица била плажата во Милочер. Таму Кејт дознала дека користењето лежалки и плажен кревет чини дури 200 евра за еден ден. Во видеото ја покажала речиси празната плажа и ја истакнала високата цена на овој вид услуга.
Потоа ја посетила плажата Свети Стефан 2, каде што ја дочекала речиси идентична цена. Комплетот со две лежалки и чадор за сонце чини 200 евра дневно, пренесе „Индекс“.
Високата цена ја изненадила Кејт, па таа прашала еден од вработените дали посетителите навистина плаќаат толкава сума за еден ден на плажа. Тој ѝ одговорил дека само еден ден претходно плажата била целосно исполнета.
„Не сум доволно богата за ова“, се пошегувала Кејт.
Сепак, таа пронашла и значително поевтина варијанта на јавната плажа од другата страна на островот Свети Стефан. Таму две лежалки во првиот ред чинат 50 евра, додека оние во последниот ред се изнајмуваат за 30 евра.
Бидејќи патувала сама, Кејт на крајот решила да не изнајмува лежалка. Наместо тоа, поставила пешкир на плажата и така го поминала денот.
View this post on Instagram