Ирскиот актер Колин Фарел ретко зборува за својот приватен живот, но во новиот документарец ја открива исклучителната блискост со синот кому му е дијагностицирана ретка болест. Филмот истовремено го прикажува и неговото долгогодишно пријателство со Ема Фогарти, која исто така се бори со тешка генетска состојба.
Фарел ретко дозволува телевизиските камери да навлезат во неговиот семеен простор, но во трејлерот за новиот документарец на HBO „The Slightest Touch“ се појавува и неговиот постар син Џејмс. Во една од сцените познатиот актер топло го прегрнува својот 23-годишен син, споделувајќи со публиката еден од ретките и интимни семејни моменти.
Џејмс е роден од поранешната врска на Фарел со манекенката Ким Борденав, а на две и пол години му бил дијагностициран Ангелманов синдром, ретко неврогенетско нарушување што се одразува врз развојот, говорот, моториката и рамнотежата, предизвикувајќи кај одредени пациенти и чести епилептични напади. Холивудскиот актер во повеќе наврати отворено зборуваше за напредокот на синот и за значењето на неговото присуство во секојдневниот живот.
„Сакам светот да биде добар кон Џејмс. Сакам луѓето да се однесуваат кон него со љубезност и почит“, изјави актерот.
Поради ваквата животна приказна, тој во 2024 година ја основаше фондацијата „Colin Farrell Foundation“, чија примарна цел е обезбедување подобра институционална поддршка за возрасните лица со интелектуална попреченост. Актерот нагласува дека голем број семејства запаѓаат во сериозен проблем токму кога децата ќе наполнат 21 година, бидејќи во тој момент престануваат или драстично се намалуваат државните социјални системи што функционирале во детската возраст.
Документарниот филм, чија режија ја потпишува Рејчел Флајт, пред сѐ ја обработува приказната за Ема Фогарти, долгогодишна лична пријателка на Фарел. Фогарти се соочува со епидермолиза булоза, исклучително ретка и тешка наследна состојба позната како „болест на пеперуткина кожа“, каде што дури и најлесниот допир предизвикува плускавци, отворени рани и неиздржлива болка. Таа со ова нарушување живее уште од раѓањето, при што лекарите своевремено им соопштиле на нејзините родители дека постои можност да не го доживее ниту својот прв роденден.
Двајцата негуваат пријателство повеќе од 15 години, а нивната взаемна почит во 2024 година резултираше со заеднички хуманитарен спортски подвиг. По повод нејзиниот 40-ти роденден, Фарел и Фогарти истрчаа на Даблинскиот маратон, каде актерот ги помина последните четири километри туркајќи ја нејзината инвалидска количка до самата цел, означувајќи по еден километар за секоја измината деценија од нејзината борба. Преку оваа кампања беа собрани повеќе од 800.000 долари за хуманитарната организација ДЕБРА.
Во остварувањето се прикажани исцрпните подготовки за спортскиот настан, реалните физички бариери на Фогарти, но и силното заедништво што го градат. Актерот без задршка говори и за сопствените минати искушенија, борбата со алкохолизмот и зависностите, потенцирајќи дека татковството му дало клучна мотивација за трезвеност од 2006 година.
Премиерата на документарецот „The Slightest Touch“ на платформата HBO Max е закажана за 25 ноември 2026 година, носејќи емотивна приказна за човечкото достоинство, надминувањето на здравствените пречки и нераскинливото пријателство.