Силен земјотрес со магнитуда од 4,7 степени го погоди подрачјето на Неапол вечерва, предизвикувајќи паника кај жителите, прекини на електричната енергија и материјална штета во неколку градови западно од италијанската престолнина.

Епицентарот беше во Флегриските полиња, во близина на Солфатара, на длабочина од околу три километри, објави италијанскиот Национален институт за геофизика и вулканологија (INGV).

Земјотресот беше регистриран во 19:46 часот по локално време и силно се почувствува во Неапол, Поцуоли, Бањоли, Фуоригрота, Кварто, како и на островите Искија и Прочида. Бројни граѓани истрчаа од своите домови во паника, додека некои делови од Неапол останаа без електрична енергија.

Најголема штета е регистрирана во Поцуоли, каде што се урна рид во близина на железничката станица Кумана Џероломини, додека огромни камења паднаа врз паркирани автомобили и целосно ги смачкаа.

Делови oд фасади, декоративни венци и малтер паднаа од неколку згради, а балкони и ѕидови беа оштетени на некои улици.

Според првичните информации, најмалку четири лица се здобиле со полесни повреди, претежно од делови од фасади и стакло. Пожарникарите објавија дека нема пријави за луѓе затрупани под урнатините, но екипите продолжуваат темелно да ги проверуваат сите згради.

На островот Прочида, градоначалникот Луиџи Муро веднаш го активираше општинскиот центар за цивилна заштита, додека на Искија беа започнати контроли на инфраструктурата, иако засега нема пријави за сериозни штети.

 

View this post on Instagram

 

A post shared by Tutto Napoli.net (@tuttonapolinet)