Пожар избувнал денеска по експлозија во воено-производствен и складиштен објект во близина на селото Белица, во општина Трјавна, Бугарија, по што биле евакуирани околу 300 работници.

Инцидентот се случил околу пладне, кога, според првичните информации, се запалил камион, по што огнот се проширил кон едно од складиштата со муниција. Инцидентот најверојатно бил несреќен случај, а не саботажа. Можно е пожарот да избувнал додека цистерна со гориво ги полнела резервоарите, по што дошло до палење и експлозија на муницијата во еден од магацините. Од објектот се слушале дополнителни детонации, а над подрачјето се издигнал густ чад.

Регионалната гувернерка на Габрово, Кристина Сидорова, соопшти дека нема загинати или повредени меѓу работниците и дека сите што биле во објектот се евакуирани.

Локалните власти ги повикале жителите на околните села да останат во своите домови поради чадот. Од безбедносни причини била наредена евакуација на блиските населени места додека траела интервенцијата на пожарникарите.

Објектот го управува приватната бугарска одбранбена компанија ЕМКО, во сопственост на бизнисменот Емилијан Гебрев. Компанијата има активности поврзани со производство, поправка и модернизација на оружје и муниција, а нејзиното работење во минатото било предмет и на меѓународни истраги.