Околу 400 училишта во Франција останаа или ќе останат затворени денес поради студентските протести што започнаа поради проблеми во образованието, а на некои места се претворија во насилство, изјави францускиот министер за образование Едуар Жефре.

„Нешто повеќе од 400 училишта и други образовни институции за кои знам ќе бидат затворени“, изјави Зефре за телевизијата Франс 2 во четвртокот вечерта.

Според канцеларијата на премиерот Себастијан Лекорни, разузнавачките служби на кризен состанок во четвртокот објавија дека протестното движење е иницирано од политичари од крајната левица, вклучувајќи ги и членовите на партијата Непокорна Франција (LFI).

Пратеникот на LFI, Луј Бојар, го отфрли тоа тврдење во изјави за француската телевизија.

Протестите поради недостиг на наставници и дотраените училишни објекти избувнаа во парискиот регион минатиот месец, а потоа се проширија низ целата земја и станаа сè понасилни. Десетици луѓе беа повредени, а полицијата уапси стотици демонстранти.

Како што објави Ројтерс, учениците направиле пожари во најмалку две средни училишта во четвртокот, додека наставниците во трето училиште во Марсеј биле случајно полеани со бензин. Најмалку еден автомобил бил запален во Стразбур, додека полицијата се судрила со млади луѓе во Тулуз за да ги растера демонстрациите.