Морето кај популарниот тајландски туристички остров Ко Лан оваа недела доби светло, интензивно зелена боја и непријатна миризба. Ваквата појава следи откако обилните дождови и поплавите предизвикаа масовно цветање на морскиот планктон.
Долж поголемиот дел од крајбрежјето се забележани густи наслаги со изразена зелена боја кои шират непријатен мирис, поради што капачите главно се преместија на плажите кои не се зафатени од овој феномен.
Она што всушност го гледаме со голо око е бојата што ја создава еден вид планктон наречен Noctiluca, вели Арвут Мунхапон.
Тој појасни дека цветањето на планктоните претставува природна појава која периодично се повторува, но нагласи дека состојбата сериозно се влошува на глобално ниво бидејќи климатските промени предизвикуваат забрзано затоплување на морињата.
Преку процесот на испирање на почвата од силните врнежи, земјоделските ѓубрива и отпадните води богати со хранливи материи директно навлегуваат во морето и го поттикнуваат брзиот раст на планктоните, објаснуваат експертите.
Во изминатите неколку недели Тајланд се соочи со значајни поплави, особено во централните провинции и во главниот град Бангкок, што драстично го зголеми приливот на слатка вода во Тајландскиот Залив и придонесе за промената на морскиот екосистем.