Турк денеска ги повика иранските власти да го прекинат насилството врз демонстрантите
Високиот комесар на Обединетите нации за човекови права, Волкер Турк, денеска ги повика иранските власти веднаш да престанат со насилството врз мирните демонстранти и да го вратат пристапот до интернет и телекомуникациските услуги кои се ограничени. Тој оцени дека актуелните мерки на власта се несразмерни и ја загрозуваат безбедноста на граѓаните.
„Убиството на мирни демонстранти мора да престане, а етикетирањето на демонстрантите како ‘терористи’ за да се оправда насилството е неприфатливо. Како што видовме во 2022 година, многу граѓани излегоа на улиците барајќи промени, но владата одговори со брутална сила за да ги потисне легитимните барања“, порача Турк.
Турк истакна дека јавни изјави од судски службеници за можноста за примена на смртна казна врз демонстрантите преку забрзани судски постапки се особено загрижувачки.
„Циклусот на насилство во Иран не смее да продолжи. Барањата на народот за правда и еднаквост мора да бидат почитувани“, додаде тој.
Според извештаите на Канцеларијата на високиот комесар, стотици лица се убиени, а илјадници се уапсени. Турк порача дека сите случаи на насилство и кршење на човековите права мора да се истражат, а сторителите да одговараат пред меѓународните стандарди за човекови права.