„Се надеваме дека пациентката ќе остане во стабилна состојба. Самата болест има своја еволуција, првите денови не се така лоши, но потоа може да се влоши затоа се следи за да може да се интервенира во одредени ситуации,“ изјави д-р Добринка Наунова Јовановска од Универзитетска клиника за инфективни болести.
Болничарката од Инфективата клиника која е заразена со конго-кримска хеморагична треска е во стабилна состојба, информираат од Инфективната клиника во Скопје.
Според информациите кои ги споделија со јавноста докторите, околу 40 луѓе се под здравствен надзор од превентивни причини. Од нив 11 кои биле во директен контакт со сега веќе хоспитализирана болничарка се под 14-дневен здравствен надзор.
„Здравствен надзор подразбира дека контактите ќе треба да се јавуваат кај надлежен епидемиолог од ЦЈЗ Скопје, тоа не е класична изолација но треба да имаат контакт со останатите, едноставно да издржат 14 дена за да не се прошири оваа зараза и се надевам ќе биде последен случај. Од претходните 29 контакти еден се потврди, а вкупно имаме здравствен надзор за 40 луѓе,“ изјави директорката на државниот санитарен и здравствен инспекторат Рената Младеновска.