Министерот за здравство Арбен Таравари изјави дека Владата и Министерството постапиле максимално одговорно по трагедијата во Кочани. Институциите обезбедија целосна грижа за повредените и нивните семејства без никаков финансиски товар.
Тој нагласи дека дури и држави со значително поголем капацитет, како Германија или Турција, би имале тешкотии со згрижување на над 190 пациенти со изгореници.
Владата и Министерството: Пациентите згрижени без трошоци, блиските добија поддршка
„Постои простор за критика, можеби некој прашува зошто пациентите не беа задржани тука. Но за мене најважен е резултатот – спасен живот. Затоа со целосна одговорност тврдам: совеста ми е чиста. Владата и Министерството направија сè што е потребно,“ изјави Таравари.
Според него, сите пациенти се лекуваат без трошок, нивните блиски патуваат бесплатно, добиваат сместување и дополнителна финансиска помош од државата.
Повик за одговорност за сите четири трагедии во последните пет години
Таравари ја повтори својата порака и побара Владата да ги разреши сите четири трагедии од изминатите пет години, во кои, според него, животот го загубиле над сто граѓани.
„Во секој од тие случаи имаше човечки грешки, институционални пропусти, па дури и корупција. Затоа, ја охрабрувам Владата – чиј дел сме и ние – конечно да ги затвори тие случаи. Треба да се излезе пред правдата, да се најдат виновниците. Ако сакаме никогаш повеќе да не се повтори вакво нешто – мора да има одговорност,“ истакна тој.
Резолуцијата за трагедијата во Кочани е повик за вистинска правда
Министерот ја потенцираше и важноста на Резолуцијата за трагедијата во Кочани. Таравари рече дека се бара Владата да ги идентификува сите одговорни лица, институционално и поединечно.
- „Тоа не е документ на политичка декларација – тоа е повик за правда. Очекувам Владата и Министерството да покажат истата решителност и во тие случаи, како што ја покажаа сега,“ додаде Таравари.
Извор: Нетпрес