Според последните податоци на Единствениот информативен портал на Бугарија, во последните 24 часа има 2826 новозаразени лица со коронавирус или вкупно 112 651 активни случаи. Тоа се 1908 случаи помалку од претходниот ден.
Како што јави дописникот на МИА од Софија, во Бугарија се зголемува бројот на лица во болниците и Одделенијата за интензивна нега. Изминатите 24 часа се направени 46 388 тестови. Процентот на позитивни е 6,1 отсто.
Според податоците на здравствените власти, 86,38 отсто од заразените во текот на денот не биле вакцинирани.
Во последните 24 часа од ковид-19 починале 65 лица, од кои 98,46 отсто не се вакцинирани.
Вкупниот број на починати во Бугарија од почетокот на пандемијата веќе достигна 25 005. Бројот на хоспитализирани е 8370, што е за 108 повеќе од петокот.
Официјалните податоци покажуваат зголемување на бројот на пациенти примени на интензивна нега, што значи, според локалните експерти, притисокот врз здравствениот систем во Бугарија ќе зголемување. На Одделенијата за интензивна нега има зголемување во однос на петокот кога биле 724, а во саботата нивниот број се зголеми на 732.
Само во последните 24 часа во болниците се примени 359 пациенти. Од нив 89,42 отсто не се вакцинирани.
Вчера во Бугарија беа дадени 6749 дози вакцини, со што се дојде до вкупната бројка од 2 960 810 дадени дози.
Математичарот проф. Николај Витанов предвидува дека за време на парламентарните и претседателските избори во Бугарија на 14 ноември ќе има зголемување на бројот на активни и смртни случаи од коронавирус. Тогаш, според неговите прогнози, ќе има пик и кај смртноста и кај активните случаи.