Белград се подготвува за UFC Fight Night, кој ќе се одржи во сабота, а во пресрет на настанот српскиот претседател Александар Вучиќ денеска го прими првиот човек на UFC, Дана Вајт. На средбата двајцата разговараа за претстојниот боречки спектакл, а Вајт доби и традиционален српски подарок.

На приемот присуствуваа и министрите Зоран Гајиќ и Дарко Глишиќ, претседателот на Српската ММА федерација Лука Николиќ, како и други гости.

Вучиќ му посака добредојде на Вајт и истакна дека Србија ќе направи сè за неговиот престој да помине во најдобра атмосфера.

„Ќе направиме сè што можеме за да ве угостиме на најдобар можен начин. И мора да ги прифатите сите наши понуди, за да ве задоволиме во наредните денови“, рече Вучиќ.

За време на средбата, Дана Вајт го донесе шампионскиот појас на UFC, со кој двајцата позираа пред присутните.

„Ова ми е прв пат во Србија. Ви благодарам за гостопримството“, изјави Вајт.

Посебно внимание привлече подарокот што српскиот претседател му го врачи на првиот човек на UFC. Вучиќ му подари српско знаме и гусла, традиционален музички инструмент.

„Имаме мал подарок за вас, сакаме да ви го подариме. Ова е српското знаме, кое е нешто што најмногу го сакаме, нешто за кое се бориме. Многумина се бореа за него и за националните интереси на нашата земја. Имаме и гусла, тоа е традиционален српски инструмент. Мора да бидете вистински уметник за да знаете како да свирите на ова“, изјави Вучиќ.

Во меѓувреме, „Спорт Клуб“ претходно објави дека Србија издвоила 2,2 милиони евра за организација на UFC Fight Night во Белград. Според информациите, средствата ги обезбедила Владата на Србија преку Министерството за спорт.

Настанот ќе се одржи во сабота вечер во „Белградска арена“, а главната борба ќе биде меѓу Урош Медиќ и Даниел Родригез во велтер категорија (до 77 килограми).

На програмата е и дебито на Александар Ракиќ во тешка категорија, каде што ќе се соочи со Марчин Тибур, додека Милош Јаничиќ ќе ги одмери силите со Французинот Ноа Гуњон.