Како што соопшти владината Прес-служба, на средбата, на која присуствуваше и вицепремиерот за европски прашања Никола Димитров, Заев изрази благодарност за оваа определба и потенцираше дека е од огромно значење што лидери, како претседателот Макрон и канцеларката Меркел, преземаат чекори со кои ги помагаат изнаоѓањата на решенија за билатералните спорови, кои влечат корени од минатото.
– На средбата премиерот Заев го поздрави лидерството на претседателот Макрон и канцеларката Меркел и им се заблагодари на Франција и Германија, кои гледаат напред кон иднината и што помагаат при решавањето на балканските спорови од минатото. Премиерот Заев на средбата ги изрази очекувањата и јасните определби на македонските граѓани за европска иднина на својата земја, потенцирајќи дека итно се потребни европски чекори од страна на сите земји членки на ЕУ со цел да не се дозволи разочарување на нашиот народ, а со тоа и зголемување на ризиците од засилување на ретроградните националистички струи, се наведува во соопштението.
За време на разговорот е изразени и заедничката подготвеност и интерес на Северна Македонија и на Бугарија да продолжи дијалогот меѓу двете земји со намера да се дојде до решение.
Претходно денеска, пред почетокот на Самитот на ЕУ за Западен Балкан што се одржува во Брдо кај Крањ. премиерот Заев одржа заедничка средба со првиот човек на Европскиот совет, Шарл Мишел, претседателката на Европската комисија, Урсула фон дер Лајен, еврокомесарот за проширување Оливер Вархеји, словенечкиот премиер Јанез Јанша и бугарскиот претседател Румен Радев.
При тоа, Заев упати порака дека „народите на Западен Балкан очекуваат декларациите на ЕУ да се преточат во дела и ако ЕУ не дејствува, разочарувањата кај народите од регионот ќе бидат непоправливи и на огромна штета на големата европска идеја за заедништво и соработка“.