Романската јавност беше шокирана откако амбулантно возило, односно возило на Брза помош беше нападнато од локалното население со секири, стапови и камења во селото Речија-Кристур во округот Клуж (северозападна Романија) на 9 август.
Шофершајбната на амбулантното возило била скршена, а возачот претрпел повреди од скршеното стакло. Медицинскиот тим успеал да избега од нападот и да се врати во базата.
Според романските медиуми, нападот бил предизвикан од видео споделено на ТикТок кое шпекулирало за стара урбана легенда за „црно амбулантно возило кое краде деца“. Видеото било генерирано или манипулирано со вештачка интелигенција (ВИ), но не било означено како содржина од вештачка интелигенција.
На денот на инцидентот во селото Речија-Кристур, вистинско амбулантно возило било испратено да му пружи медицинска помош на пациент. Кога пристигнало амбулантното возило, група луѓе го нападнале со камења, палки и секири.
Сè уште не е утврдено дали некој им кажал на жителите на Речеа-Кристур дека „доаѓа брза помош што краде деца“, туку дека социјалните мрежи создале информативна средина во која таквата изјава им изгледала веродостојна на некои луѓе, забележуваат медиумите.
Државниот секретар во Министерството за внатрешни работи и началник на Одделот за вонредни ситуации, д-р Раед Арафат, го привлече вниманието на тоа како лажните информации на социјалните мрежи, во комбинација со слики од вештачка интелигенција, можат да доведат до вистински дејствија од страна на луѓето.
По нападот, обвинителството започна истрага, а седум лица – шест мажи и една жена – беа испратени во притвор.
Заменик-претседателката на Националната либерална партија (НЛП) Ралука Турџан ги повика државните институции да ја разгледаат можноста за забрана на социјалната мрежа ТикТок на територијата на Романија, објавува новинската веб-страница Ziare.
Во објава на Фејсбук, пратеничката на НЛП ја обвини кинеската компанија зад социјалната мрежа ТикТок за „јасен неуспех“ во управувањето и отстранувањето на вештачки создадена и манипулативна содржина, посочувајќи дека јавната и националната безбедност мора да преовладаат над ваквите ризици.
Ралука Турџан потсети дека платформата била вклучена и во промовирање на претседателски кандидат со проруски и пролегионистички ставови, осврнувајќи се на Калин Георгеску, кој изненадувачки победи во последователно откажаниот прв круг од претседателските избори во ноември 2024 година.