Франција и Германија побараа итни нови овластувања и заштитни механизми од Европската комисија со цел Европската Унија поефикасно и побрзо да ги заштити своите пазари. Главната цел на оваа иницијатива е да се обезбеди одговор на сè поизразениот трговски притисок што доаѓа од Кина.
Оваа барање е упатено преку заедничко писмо од францускиот претседател Емануел Макрон и германскиот канцелар Фридрих Мерц до претседателката на Европската комисија, Урсула фон дер Лајен.
Во придружниот документ кон писмото, Париз и Берлин предупредуваат дека силен индустриски удар во моментов директно ги погодува клучните сектори на европското стопанство. Меѓу најзасегнатите се издвојуваат фармацевтската, авионската и автомобилската индустрија, како и производството на индустриски машини и хемикалии.
Франција и Германија нагласуваат дека заштитата на само одделни и ограничени категории производи веќе не е доволна, со оглед на тоа што трети држави остваруваат глобална доминација во цели синџири на производство и предизвикуваат посистематски пазарни нарушувања.
Предлогот предвидува создавање нов, државно неутрален инструмент кој би се активирал доколку трети земји со политички или економски средства ги нарушат рамноправните услови и фер пазарната конкуренција. Овој механизам би овозможил брзо донесување одлуки за ограничување на пристапот до единствениот европски пазар, опфаќајќи ги сите видови деформации – од поединечни артикли до цели индустриски сектори, како и од државни субвенции до валутни манипулации. Покрај тоа, се предлага и посебен нов механизам за проценка на зависноста на ЕУ од еден добавувач или држава и нивниот удел на глобалниот пазар.
Француските и германските лидери истовремено предупредуваат дека воведувањето поригорозни трговски мерки може да предизвика реваншистички одговор и да го стави на тест политичкото единство на Унијата. Поради тоа, од Европската комисија се бара однапред да изработи листа на можни возвратни мерки и да го процени нивното влијание врз секоја одделна земја членка.
Напоредно со ова, од Брисел се бара значително почесто да покренува истраги по сопствена иницијатива и многу порешително да ги применува веќе постојните инструменти за трговска заштита.