Одмазднички пожар: Пандов директно обвинува затворски банди

Директорот на Управата за извршување санкции, Александар Пандов, тврди дека затворски банди стојат зад палењето на неговата викендичка во Орешани. Според него, пожарот бил нарачан  со мобилен телефон, нелегално внесен во затвор.  Тоа според него е чин на одмаза за неговата решителна борба против корупцијата и криминалот во затворите.

(ВИДЕО) Познати првите детали за запалената куќа на Пандов

Претходни закани и предупредувања за можен напад

Иако немал директни закани, Пандов објасни дека долго време добивал информации за можно насилство. Вработени во затворите и самите затвореници му пренесувале гласини за планови да му се наштети. Тој смета дека нападот е насочен не само кон него. Нападот според Пандов е насочен  и кон Владата и премиерот Христијан Мицкоски.

„Ова не е напад врз Александар Пандов, ова е напад врз функцијата – симбол на борба против криминалот“, изјави тој.

Пандов: Некои затвореници нуделе и по 20.000 евра за мобилен телефон

Според директорот, затворски банди користеле корупција за да продолжат со криминал и одвнатре. Пандов откри дека затвореници нуделе високи суми на затворската полиција за да дојдат до мобилни телефони.

„На некои им понудија и суми со четири нули. Телефоните се клуч за организирање кривични дела и надвор од затворот“, вели Пандов.

Режимот во затворите: Од шерифи до заканувачи

Пандов посочи дека дел од затворениците се однесувале како „газди“, тепале полицајци, и организирале лихварство. Тој истакна дека системот што го затекнал бил сериозно корумпиран и дека токму таквите луѓе се оние што најсилно се спротивставуваат на новиот ред.

Детали за пожарот: целосно уништена куќа без видео надзор

Нападот се случил во раните утрински часови, без сведоци и без видео надзор. Пандов не престојувал таму последните четири години, но го опиша објектот како свој „втор дом“. Целата внатрешност била изгорена, а според него, се работи за професионално извршена акција.

Пандов не се повлекува: „Жестоко ќе одговориме“

И покрај заканите и уништувањето на неговиот имот, Пандов е решен да ја продолжи битката. Тој вели дека е подготвен да се соочи со најтешките ризици, дури и смртни закани.

„Ниту педа назад нема да се вратам. Борбата продолжува и ќе биде уште поостра“, вети Пандов.

МВР истражува, Пандов со сериозни сомнежи и закани до виновниците

Министерството за внатрешни работи е вклучено во истрагата. Пандов има индиции, но сè уште не објавува имиња. Тој порача дека оние кои стојат зад нападот, доколку се откријат, ќе ја сносат најстрогата можна одговорност.

Инцидентот со палењето на викендичката во Орешани го разгорува прашањето за влијанието на затворските банди врз безбедноста во државата. Изјавите на Пандов откриваат алармантни пропусти во системот и сериозни обиди за дестабилизирање на институциите преку насилство и корупција.

Извор: Миа