Ахмети изрази спремност за политичко повлекување: ќе се откаже ако ги загуби следните избори

Али Ахмети, лидерот на ДУИ, изјави дека е подготвен да се повлече од политичката сцена доколку ги загуби следните избори. На неодамнешните прозивки од коалицијата ВЛЕН, тој јавно нагласи дека нема што повеќе да загуби и дека ќе ја прифати одговорноста ако не успее на изборите. Оваа изјава доаѓа во контекст на зголемениот притисок и прашањата за неговата иднина во политиката.

  • “Слушнав, бараат кај нотар да сум потпишал, дека доколку со еден глас ги загубам изборите, нема да бидам дел од власта. Четврт век зборувам, ако ги загубам изборите, ќе се повлечам од политиката и ќе си одам дома,” рече Ахмети, нагласувајќи ја својата решителност.

Последен обид на Ахмети за спас на кариерата

Од коалицијата ВЛЕН коментираат дека иницијативата на Ахмети за предвремени парламентарни избори е само обид да ја спаси својата политичка кариера. Според нив, оваа одлука се должи на недостиг од кадровски и програмски реформи во рамките на ДУИ, што ја покажува слабоста на партијата. Министерот за здравство и еден од лидерите на ВЛЕН, Арбен Таравари, исто така предвидува крај на политичката кариера на Ахмети. Тој изјави дека реториката на Ахмети е веќе позната и дека ова е обид да се прикрие незадоволството внатре во партијата.

  • “Сметам дека политичкиот крај на Али Ахмети ќе бидат локалните избори. Убеден сум дека ВЛЕН ќе оствари значителен успех и дека господинот Ахмети ќе го прифати поразот таа вечер. Според мене, ова се последните избори во неговата кариера, и таа ќе заврши, за среќа или за жал, зависно од тоа како гледате на тоа,” истакна Таравари.

Предвремени избори на хоризонтот?

Прашањето за предвремени парламентарни избори беше отворено на првата собраниска седница за пратенички прашања. На барање на опозицијата, премиерот Христијан Мицковски истакна дека е подготвен повторно да го докаже легитимитетот кој го доби на последните избори, нагласувајќи ја својата спремност да се соочи со граѓаните.

Анкетите предвидуваат убедлива победа на ВМРО-ДПМНЕ

Според најновите анкети, ВМРО-ДПМНЕ и премиерот Христијан Мицковски се во водство со значителна предност пред останатите партии. Мицковски е најпопуларниот политичар во земјата, со поддршка од 27.8% од граѓаните, додека лидерот на опозицијата, Венко Филипче, има само 5.5% поддршка. Доколку утре се одржат парламентарни избори, ВМРО-ДПМНЕ би имала значајна предност пред СДСМ и ДУИ.

Исто така, 26% од анкетираните изразиле доверба во владејачката партија, што е далеку пред СДСМ, ДУИ и ВЛЕН, кои имаат идентична поддршка од по 7%. По нив следува Левица со 5%, а ЗНАМ со 4%.

Коалицијата “Твоја Македонија”, предводена од ВМРО-ДПМНЕ, ужива поддршка од 31% од испитаниците, додека коалицијата “Европска иднина”, предводена од СДСМ, има поддршка од само 10%.

Перспективи за предвремени избори и ДУИ

Со политичката сцена која е значително динамична, останува да се види дали ќе има предвремени избори, а доколку има, дали Ахмети навистина ќе се повлече од политиката откако ќе ги загуби изборите. Сепак, моментално Македонија има стабилна Влада со силно мнозинство и нема потреба од трошење на народни пари за кампањи. Очекуваме да го видиме резултатот на локалните избори и како Ахмети ќе регира.  Дали Ахмети би имал храброст самостојно како ДУИ да се соочи со ВЛЕН во борба за легитиметот кај Албанците или повторно ќе бара гласови од Бошњаците, Турците и Ромите на потенцијални предвремени парламентарни избори, останува да се види.