Контролите покажале отстапувања меѓу декларираниот и реалниот состав кај дел од производите

Вонредните контроли на Агенцијата за храна и ветеринарство откриле неправилности кај дел од млекото и млечните производи што се продаваат на домашниот пазар. По лабораториските анализи на 45 мостри, кај 10 оператори биле утврдени отстапувања од декларираниот состав, по што биле изречени парични казни, а дел од производите биле повлечени и уништени.

Официјалните ветеринари на АХВ земале вкупно 91 мостра од млеко и млечни производи, како и од сувомесни производи од домашно производство и од увоз. Контролите биле спроведени со цел да се утврди дали квалитетот на производите соодветствува на податоците наведени на декларациите.

Засега се комплетирани резултатите за млечните производи, додека анализите за сувомесните производи сè уште се во тек.

Кај дел од производите имало значително помалку млечни масти од декларираното

Од анализираните 45 мостри млеко и млечни производи, кај 10 оператори било утврдено дека производите не ги исполнуваат условите од Правилникот за квалитет на земјоделските производи.

Контролите покажале дека кај дел од производите процентот на млечни масти бил значително понизок од оној наведен на декларацијата.

На еден оператор му била изречена казна од 3.500 евра во денарска противвредност, откако лабораториските анализи покажале дека ситно сирење декларирано со 20 проценти млечна маст содржело само 1 процент.

Поради утврдени разлики меѓу декларираниот и реалниот процент на млечна маст, уште осум производители и увозници добиле казни од по 1.050 евра во денарска противвредност.

Казна и за користење палмина маст во млечен производ

Кај друг оператор било утврдено дека во производството на млечен производ користел растителни, односно палмини масти.

Поради оваа неправилност му била изречена казна од 1.300 евра во денарска противвредност.

Од промет биле повлечени вкупно 500 килограми од спорниот производ, кои потоа биле нештетно уништени на депонија.

Од Агенцијата за храна и ветеринарство најавуваат дека засилените инспекциски контроли кај производителите, увозниците и трговците со млечни производи ќе продолжат и во наредниот период.