Над 250 дрвја се искроени, а околу 100 суви и ризични дрвја се отстранети од јавните површини во Чаир во рамките на акцијата што трае повеќе од три недели. Активностите ќе продолжат во период од една година и ќе ги опфатат сите локации во општината каде што ќе се утврди потреба од интервенција.
Акцијата за одржување и унапредување на јавното зеленило се спроведува по иницијатива на Општина Чаир, во соработка со ЈП „Паркови и зеленило“ и компанијата АДМ-АЛ. Целта е да се подобри состојбата на урбаното зеленило и да се отстранат дрвјата што претставуваат ризик, со што јавните површини ќе бидат побезбедни и поуредени за граѓаните.
Пристапот при работата се приспособува на условите на теренот. Интервенциите се изведуваат професионално, а на локациите што бараат специјализиран пристап се применува и методата „tree climbing“, односно качување на дрвјата.
Истовремено со кроењето и отстранувањето на сувите и ризичните дрвја, екипите ги собираат и транспортираат гранките, зелениот отпад и другиот материјал што останува по интервенциите. Работите се одвиваат во согласност со Законот за урбано зеленило и соодветните законски надлежности.
Предвидениот едногодишен период значи дека активностите ќе продолжат и по досегашните зафати, според утврдените потреби на целата територија на Чаир.