Грчката антитерористичка полиција уапси три лица во истрагата за серијата напади со импровизирани запаливи направи врз домови и имот поврзани со функционери на владејачката Нова демократија во Солун. Меѓу уапсените се 29-годишен маж и 26-годишна жена, осомничени дека учествувале во нападите, додека третото лице наводно им помагало да се кријат.
Полицијата спроведува претреси на објекти и возила во Солун и на Крит. Нападите се случиле на 1 јули, во период од околу дваесет минути, на три различни локации поврзани со претставници на Нова демократија. Направите биле составени од мали плински боци и биле поставени пред станбени згради и покрај паркирани автомобили.
Најтешки последици имал нападот пред домот на кандидатката за пратеничка Афродити Нестора, каде што биле повредени пет лица. Нејзината 72-годишна мајка Ваја Нестора добила тешки изгореници и починала истиот ден во болница, додека и самата Нестора била хоспитализирана. Другите два напади предизвикале материјална штета на локации поврзани со поранешниот пратеник Савас Анастасиадис и со локалниот функционер Зисис Јоакимовиц.
Засега нема информации дека некоја организација ја презела одговорноста. Грчките власти случајот го истражуваат како политички мотивирано насилство, а истрагата продолжува и за евентуална вмешаност на други лица.