Растечкиот број несреќи и безбедносните ризици зад одлуката
Градските власти во Брисел одлучија да стават крај на изнајмувањето електрични тротинети. Забраната ќе стапи во сила во 2027 година и е образложена со серија безбедносни и јавни проблеми поврзани со нивната употреба.
Одлуката доаѓа по зголемениот број сообраќајни несреќи, попречувањето на другите учесници во сообраќајот и злоупотребата на електричните тротинети за криминални активности.
Според достапните податоци, во 2025 година во Брисел биле повредени 666 лица во несреќи во кои учествувале електрични тротинети. Тоа претставува пораст од повеќе од една четвртина во споредба со 2024 година.
Непрописно паркирање и употреба во криминални дејствија
Непрописно оставените тротинети често го отежнуваат движењето на пешаците и велосипедистите. Граѓаните со години укажуваат дека тие претставуваат пречка на тротоарите и јавните површини.
Дополнителна загриженост предизвикале и податоците од обвинителството. Јавниот обвинител во Брисел, Жилиен Моанил, посочил дека изнајмените електрични тротинети минатата година биле искористени во 25 вооружени престрелки во главниот град.
Нема продолжување на договорите со компаниите
Договорите на двете компании што моментално нудат услуги за изнајмување електрични тротинети во Брисел – „Болт“ и „Дот“ – истекуваат на крајот од годинава.
Градските власти соопштија дека тие нема да бидат обновени, со што постепено ќе започне спроведувањето на забраната.
Брисел не е првиот европски град што се одлучува на ваков чекор. Изнајмувањето електрични тротинети веќе е забрането во Париз, Мадрид и Прага.