Документите откриваат контроверзии околу трговскиот претставник
Долниот дом на британскиот парламент денеска одобри објавување на документи што се поврзани со улогата на поранешниот принц Ендру како трговски претставник. Позицијата ја држеше една деценија, а документи се очекува да откријат детали за неговите контакти со покојниот американски финансиер Џефри Епстин.
Не е познато кога документите ќе бидат објавени. Претходно минатата недела, принцот Ендру беше приведен под сомнение за злоупотреба на службената положба, но беше ослободен без обвинение. Истрагата против него продолжува.
Скандалот допира до врвот на британската елита
Предлогот за објавување беше поднесен од лидерот на Либералните демократи, Ед Дејви.
„Во многу погледи ова е првиот вистински глобален скандал: од Белата куќа и Силиконската долина до Осло и Париз, но тоа е и длабоко британски скандал, кој допира до врвот на британската елита“, истакна Дејви на дебатата.
Помладиот брат на кралот Чарлс III, кој минатата година ги изгуби титулите поради откритија за врските со Епстин, сега е познат како Ендру Маунтбатен-Виндзор.
Објавувањето на документите следува по одлуката на Министерството за правда на САД да открие милиони страници документи за Епстин, кои ја откриваат меѓународната мрежа на богати и влијателни пријатели што тој ја користел за сексуална експлоатација на млади жени.