Почина уште едно лице по масовното пукање во училиштето БОРГ
Бројот на загинати во масакрот во училиштето БОРГ во Грац денеска се искачи на единаесет, откако едно повозрасно лице им подлегна на повредите во Универзитетската болница во Грац. Масакрот, кој утрово го потресе целиот регион, веќе се смета за една од најтешките трагедии во поновата австриска историја.
(ВИДЕО) Трагедија во Грац: Најмалку девет мртви по вооружен напад во средно училиште
Девет жртви на самото место, напаѓачот извршил самоубиство
Во утринските часови, во просториите на средното училиште БОРГ во Грац, вооружен напаѓач отворил оган и убил девет лица на самото место. Потоа, според информациите од австриската полиција, извршил самоубиство. Меѓу жртвите има ученици, наставници и административен персонал.
Повредени најмалку 28 лица – ученици и вработени
Според официјалните податоци, најмалку 28 лица се повредени, од кои дел се во критична состојба. Во таа бројка се вклучени ученици, наставници и други вработени во училиштето. Медицински тимови веднаш реагираа, а сите повредени беа префрлени во болниците низ Грац.
Австрија прогласи тридневна национална жалост
Како одговор на трагедијата, австриските власти прогласија тридневна национална жалост. Знамињата на сите јавни институции се спуштени на половина копје, а институциите повикаа на солидарност и почит кон настраданите.
Истрагата продолжува – мотивите на напаѓачот сѐ уште не се познати
Иако напаѓачот е идентификуван, мотивите зад нападот сѐ уште се предмет на истрага. Полицијата работи на реконструкција на настаните и испитување на поврзаноста меѓу напаѓачот и училиштето. Дополнителни детали се очекуваат во наредните денови.
Извор: Миа