Градоначалникот на Општина Бутел, Дарко Костовски, порача дека борбата со бандити не претставува меѓуетничка борба и нагласи дека криминалот не познава нации. Тој испрати јасна порака дека нема намера да отстапи од заложбите против криминалните појави и урбаната мафија.
Костовски упати директни обвинувања до одредени политички партии, наведувајќи дека се наоѓаат под влијание на криминални структури кои намерно се обидуваат неговите институционални активности да ги претстават како некаква меѓуетничка пресметка.
Градоначалникот тврди дека неговото дејствување е фокусирано против сите поединци и групи што го нарушуваат јавниот интерес и што ги третираат зелените површини исклучиво како шанса за градење нови објекти заради личен профит. Тој подвлече дека какви било притисоци нема да го поколебаат и дека ќе продолжи со спроведување на истата одлуdraftтна политика во текот на целиот мандат.
„Не може општината да биде партнер со криминалци, со бандити. Имаше една таква жална епизода, таа е поминатa. И во таа смисла, еве еден мој јавен апел: колку и да овие бандити, оваа урбана мафија се крие зад политички партии и каков притисок и да прави, додека сум јас градоначалник на Општина Бутел, простор за криминалци, бандити и сите оние коишто им мислат лошо на Општина Бутел нема“, вели Костовски.
Тој во своето обраќање додаде дека општината ќе продолжи уште посилно и со поголема динамика во реализацијата на проекти што треба да го направат Бутел најубаво место за живеење во Скопје.
